Uurka meesha aan la aqoon: Su’aalaha badanaa la isweydiiyo

Tani micneheedu maxay tahay?

Uurka Meel aan la garanayn (PUL) waa marka baaritaanka uu tusinaayo in aad uur leedahay laakiin uur laguma arki karo sawirka ultrasound-ka. Waxaa jira saddex sababood oo waaweyn oo tan keeni kara:

• 1. Uurku wuxuu joogaa goor hore waana wax aad u yar marka laguma arki karo sawirka ultrasoundka.
• 2. Uurku wuu dhicisoobay oo laguma arki karo sawirka ‘ultrasound scan’. Waxay qaadan kartaa ilaa 3 toddobaad heerarka hoormoonka uurka inuu hoos ugu dhaco, taasina waa sababta baaritaanka uu weli uurka u tusi karo. Xaaladdaani waxay u badan tahay haddii aad dhowaan dhiigbax culus yeelatay.
• 3. Ilmuhu wuxuu ku dhex abuurmay banaanka ilmo galeenka, oo loo yaqaano ‘uurka ectopic’, laakiin aad ayuu u yar yahay marka laguma arki karo sawirka ultrasoundka.

Maxaa dhici doona marka xigta?

Waxaad mari doontaa baaritaanka heerka hormoonkaaga uurka (βHCG). Isbitaalada qaarkood waxay sidoo kale qaadaan baaritaan si ay u qiimeeyaan heerka ‘progesterone’ (hoormoonka ugxaansidaha). Heerarka βHCG ayaa markaa lagu soo celin karaa 48 saacadood ka dib iyadoo loo eegayo borotokoolka Qaybta Uurka Hore ee deegaankaaga (EPU). Heerka βHCG oo kor u kaca 63% muddo 48-saac gudeheed ah (oo loo yaqaano ‘waqtiga labanlaabka’) badanaa (laakiin aan mar walba ahayn) wuxuu la xiriira uurka ku jira ilmo galeenka. Qaabkan baaritaannada dhiiggu waxay gacan ka geysan doonaan hagidda maareyn dheeraad ah oo ay kujirto goorta lagu celcelinayo baaritaannada dhiigga ee dheeraadka ah, baaritaannada uurka kaadida ama baaritaanka ultrasound-ka ee soo noqnoqda. Tani waxay noqon kartaa waqti walaac badan, waana wax caadi ah in la dareemo walwal halka meesha aad uurka leedahay aan la hubin, gaar ahaan haddii aad horay u soo martay uur. Si kastaba ha noqotee, waqtiga loo baahan yahay si loo xaqiijiyo ogaanshaha saxda ah waa muhiim waxaana kugu taageeri doona kooxdaada takhasuska leh ee EPU. Waxaa lagugula talin doonaa inaad ka qeybgasho baaritaanno dhiig oo dheeri ah iyo iskaan si aad u xaqiijiso ogaanshaha saxda ah ee goobta uurka iyo si laguu siiyo daryeelka saxda ah iyo taageerada aad u baahan tahay. Waxaad awood u yeelan doontaa inaad kooxda kala xiriirto wixii su’aalo ama walaac ah ee aad qabtid waqtigaan.

Waa maxay calaamadaha walaaca leh ee aan iska fiirin karo?

Khatarta ayaa ah in tani ay noqon karto uur aanan ku jirin ilmo galeenka, oo mararka qaar sababi kara dhiigbax gudaha jirka ah . Halista ay tani ku dhacdo waa mid aad u hooseysa kooxdaada EPU-na way ku hagi doonaan. Si kastaba ha noqotee, waa inaad wacdaa EPU-gaaga maxalliga ah si aad talo uga hesho ama aad uga qeyb gasho waaxda Shilalka iyo Xaaladaha Degdegga ah ee deegaankaaga haddii aad ka welwelsan tahay waxyaabaha soo socda:

• Dhiigbax ku dhaca xubnaha taranka: Haddii aad qabtid dhiigbax culus oo leh calool xanuun daran, qandho, ama dheecaan aan wanaagsaneyn waa inaad raadsataa gargaar caafimaad oo deg deg ah. Si kastaba ha noqotee, dhiigbaxa uurka waa caadi oo laga yaabo inuusan mid culus ahayn. Mar walba ma ahan astaan tusineysa arrin halis ah laakiin waa in had iyo jeer la baaraa.
• Calool xanuun: Tani waxay caadi ahaan ku dhacdaa qaybta hoose ee calooshaada, badanaa dhinac dhinac ayey u koraysaa si tartiib tartiib ah ama si lama filaan ah waxayna noqon kartaa mid aad u daran. Xanuunku wuu imaan karaa wuuna tagi karaa mararka qaarkoodna waxaa loo maleyn karaa cudurka keena neefta caloosha ku xayiran. Xanuunka sidoo kale waa in had iyo jeer la baaraa xilliga uurka uu hor leeyahay.
• Xanuunka garabka: Tani waa xanuun ku wareegsan agagaarka garbaha, waana inaad raadsataa gargaar caafimaad oo deg deg ah haddii taasi dhacdo. Waxaa lala xiriirin karaa dhiigbax gudaha ah oo caloosha ku jira taasoo keeneysa in neerfaha ay xanuunka geeyaan garabka.
• Shuban: Tani waxaa sidoo kale lala xiriirin karaa dhiigbax gudaha ah sida xanuunka garabka oo kale, sida kor lagu sharaxay. Xaaladaha noocaas ah waxay sidoo kale keeni doonaan xanuun caloosha ah waana inaad sidoo kale raadsataa gargaar caafimaad oo deg deg ah haddii taasi dhacdo.
• Dillaaca uurka ‘Ectopic’: Ka sokow waxa kor ku xusan, mid kasta oo ka mid ah astaamaha soo socdaa waxay noqon karaan calaamad dillaaca uurka loo yaqaano ‘ectopic’ waxayna u baahan tahay xaadiritaanka kooxaha gurmadka deg degga ah – xanuun daran oo caloosha ah oo joogto ah, lallabbo/matag; dawakhaad/dareen suuxdin; muuqaal baaba’ ah.